05 մարտի 2009
Գումարվել է «Ոչնչացում» մաքսային ռեժիմով ՀՀ տարածք ներմուծված ապրանքների ոչնչացման աշխատանքները կազմակերպող հանձնաժողովի առաջին նիստը նոր կազմով
Այսօր գումարվել է «Ոչնչացում» մաքսային ռեժիմով ՀՀ տարածք ներմուծված ապրանքների ոչնչացման աշխատանքները կազմակերպող հանձնաժողովի առաջին նիստը նոր կազմով:
Այսօր գումարվել է «Ոչնչացում» մաքսային ռեժիմով  ՀՀ տարածք ներմուծված ապրանքների ոչնչացման աշխատանքները կազմակերպող հանձնաժողովի առաջին նիստը նոր կազմով: Հանձնաժողովի նախագահն է ՀՀ ՊԵԿ նախագահ Գագիկ Խաչատրյանը: Բացի Պետեկամուտների կոմիտեից, հանձնաժողովի նոր կազմում ընդգրկված են ներկայացուցիչներ ՀՀ ոստիկանությունից և ԱԱԾ-ից, ինչպես նաև ՀՀ բնապահպանության, գյուղատնտեսության, առողջապահության,  մշակույթի և էկոնոմիկայի նախարարություններից: Ներկայացնելով նիստի օրակարգում ընդգրկված հարցերը` ՀՀ ՊԵԿ մաքսային վիճակագրության, վերլուծության և ռիսկերի կառավարման վարչության պետ Գառնիկ Միրզոյանը նշել է, որ առջևում հանձնաժողովին բավականին ծավալուն աշխատանքներ են սպասվում. «Ամբողջ աշխարհում այսօր շատ լուրջ է դրված թափոնների խնդիրը, քանի որ երբեմն ոչնչացման աշխատանքների համար շատ ավելի մեծ ծախսեր են պահանջվում, քան ոչնչացման ենթակա ապրանքների արտադրությունը կազմակերպելու համար: Ուստի առաջիկայում մեզ բավականին լուրջ և ծավալուն աշխատանքներ են սպասվում, առավել ևս որ կուտակվել են «ոչնչացում» մաքսային ռեժիմով լրացված 80-ից ավել հայտարարագրեր»:

Ի դեպ, հանձնաժողովը գործում է դեռևս 2000 թվականից, երբ ՀՀ կառավարության նույն թվականի թիվ 901 որոշմամբ հաստատվեց «ոչնչացում» մաքսային ռեժիմի կիրառման կարգը, համաձայն որի` նշված մաքսային ռեժիմն ընտրելու դեպքում, ապրանքներ տեղափոխող անձը մաքսային մարմիններ է ներկայացնում  «ոչնչացում» մաքսային ռեժիմով լրացված հայտարարագիր, որն ընդունող մաքսային մարմնի ղեկավարը գրավոր դիմում է հանձնաժողովին: Հանձնաժողովի նախագահը, ստանալով, դիմումը, հրավիրում է հանձնաժողովի նիստ, որի ընթացքում որոշում է ընդունում ապրանքների հետագա պիտանիության, վտանգավորության, դրանց ոչնչացման եղանակը ուսումնասիրելու, ոչնչացման հետ կապված ծախսերը նախնական գնահատելու մասին և այլն: