13 փետրվարի 2009
Շուրջ 950 շահող արդեն ստացել է պարգԵՎավճարը ՀՀ Բանկերի միությունը հրապարակել է շահումների տվյալները
ՀՀ Բանկերի միությունից ստացված տվյալների համաձայն, մինչԵՎ փետրվարի 13-ը առԵՎտրային 21 բանկերից իրենց պարգԵՎավճարը ստացել է 952 շահող:
ՀՀ Բանկերի միությունից ստացված տվյալների համաձայն, մինչև  փետրվարի 13-ը   առևտրային 21 բանկերից իրենց պարգևավճարը ստացել է 952 շահող: Այդ պահի դրությամբ հայտնի տվյալները լրագրողներին ներկայացրել է ՀՀ Բանկերի միության նախագահ Էմիլ Սողոմոնյանը:  Այդպիսով, հայտնի է դարձել, որ  5.000 դրամ է շահել 860,  20.000 դրամ` 80,  50.000դրամ` 8 և  500.000 դրամ` 4 քաղաքացի:

Էմիլ Սողոմոնյանը տեղեկացրել է, որ բանկերում շահողների հոսքը շարունակվում է: Վիճակահանության արդյունքի ամբողջական պատկերը պարզ կլինի փետրվարի 28-ին:
 
Ընդհանուր առմամբ, ՀՀ Բանկերի միության նախագահը ոչ մի բանկից ահազանգ չի ստացել. «Որևէ կեղծիքի վերաբերյալ տվյալներ չունենք. կեղծ կտրոններ ներկայացնելու փորձեր չեն եղել: Բողոքներ չեն գրանցվել նաև այս կամ այն պատճառով շահած գումարը չվճարելու հետ կապված, այսինքն` այս ընթացքում որևէ տարաձայնություն չի արձանագրվել: Գործընթացն իր հունով, սահուն գնում է»:

ՀՀ պետեկամուտների կոմիտեի հարկային հաշվառման և հսկողության ընթացակարգերի բաժնի հարկային տեսուչ Հրաչյա Մուրադյանը ևս մեկ անգամ հորդորել է խնամքով վերաբերել ՀԴՄ կտրոններին` հետագայում, շահելու դեպքում, բանկերում խնդիրներից զերծ մնալու համար: «Պետք է հիշել, որ ՀԴՄ ժապավենի թուղթը ջերմագրվող է, այսինքն`ջերմության ազդեցության տակ լուրջ փոփոխությունների է ենթարկվում»:

Հ. Մուրադյանը նաև ընդգծել ու հիշեցրել է, որ 5.000-ից մինչև 20.000 դրամ պարգևավճարը տրվում է տեղում, խոշոր շահումները վճարվում են փաստաթղթերը ներկայացնելուց հետո 3-օրյա ժամկետում: Ընդ որում, խոշոր շահումները  տրամադրելուց առաջ մանրամասն ստուգվում են տվյալ կտրոնի անհրաժեշտ տվյալները: Հրաչյա Մուրադյանի տվյալներով, նախ համադրվում են 3 տեղից` բանկ-ՊԵԿ-երաշխավորված  կազմակերպություն, ստացված տվյալները, և միայն դրանից հետո է պարգևավճարը տրամադրվում շահողին: