Գյումրեցի 16-ամյա Հակոբ Պողոսյանին հաջողություն է բերել հունվարի 24-ին կատարած գնումը: Ընդ որում, նա չի թաքցնում, որ խանութում խորամանկության է դիմել. մի քանի անգամ է առևտուր արել` ավելի շատ կտրոն ունենալու համար:

Խոշոր շահումը` 500 հազար դրամ, Հակոբին պարգևել է  7 6 2 0 1 8 4 6 համարով կտրոնը: Դրանով գնել էր 750 դրամի շոկոլադ:  «Ես հավատում էի և շահեցի, հենց այդ նպատակով էլ հավաքել էի կտրոնները` շուրջ 150 հատ: Վստահ էի, որ գոնե 5 հազար դրամ կշահեի և շահեցի 100 անգամ ավելի»:

Հ. Պողոսյանի հետ բանկ էր եկել նաև քեռին` Արտաշեսը: Լրագրողներին նա պատմել է, որ առևտուր անելու համար գումարն ինքն էր տվել ու կատակել, թե շահելու դեպքում կկիսվեն: Կատակը, փաստորեն, վերածվել է իրականության, այնպես որ Հակոբին բաժին է հասել 250 հազար դրամը: «Նախատեսում եմ այդ գումարով կենցաղային տեխնիկա գնել` լվացքի մեքենա: Զուգահեռ շարունակում եմ կտրոններ հավաքել `մարտի վիճակահանության համար»:

Արտաշես Ղազարյանը նույնպես խորհուրդ է տվել պահանջել կտրոնները, բայց նաև նկատել է, որ առևտրի որոշ օբյեկտներում մի շարք խնդիրներ են առաջանում. «Վաճառողները երկար են սպասեցնում` կտրոն տրամադրելու համար, այնպես, որ շատ դեպքերում մարդիկ այդքան չեն էլ սպասում: Կամ էլ հերթեր են գոյանում. հսկայական խանութներում աշխատում են ընդամենը մեկ հսկիչ-դրամարկղային մեքենայով: Հաճախորդն ուղղակի թողնում-գնում է` առանց կտրոն վերցնելու»: